Archive | ຊີວິດ-ຄວາມຮັກ RSS feed for this section

ຄຳເວົ້າດີໆ ທີ່ລູກຢາກໄດ້ຍິນຈາກພໍ່ແມ່

21 Jul

  ຫລາຍຄົນມັກເວົ້າວ່າ “ການກະທຳນັ້ນສຳຄັນກວ່າການເວົ້າ” ແຕ່ບາງຄົນກະທຳພຽງຢ່າງດຽວຈົນລືມຄຳເວົ້າໄປເລີຍ ກໍ່ມີໂດຍສະ ເພາະໃນຄອບຄົວດຽວກັນຜູ້ເປັນພໍ່ແມ່ກໍ່ຢາກໃຫ້ລູກບອກຮັກ, ກອດ, ຫອມແກ້ມ ຫລື ເວົ້າຄຳດີໆແຕ່ໃນທາງກັບກັນລູກກໍ່ມີຄວາມຕ້ອງ ການຄືກັບພໍ່ແມ່.

ດັງນັ້ນ ລອງມາເບິ່ງກັນວ່າ ຄຳເວົ້າດີໆທີ່ລູກຢາກໄດ້ຍິນຈາກພໍ່ແມ່ນັ້ນມີແນວໃດແດ່:

1. ພໍ່ແມ່ຮັກລູກຫລາຍເດີ້: ແນ່ນອນວ່າລູກຄືດວງໃຈຂອງພໍ່ແມ່ ແຕ່ການເບິ່ງຂ້າມຄຳເວົ້າງ່າຍໆແລະ ມີຄວາມຫມາຍຂະຫນາດນີ້ມັນ ກໍ່ເປັນສິ່ງທີ່ຜິດພາດທີ່ຍິ່ງໃຫຍ່ທີ່ສຸດເພາະຄົນຫລາຍຄົນບໍ່ມີໂອກາດທີ່ຈະບອກຮັກລູກໃນວິນາທີສຸດດ້ວຍຊ້ຳ.

2. ພໍ່ແມ່ພູມໃຈໃນຕົວລູກຫລາຍ: ອາດຈະມີບາງຢ່າງທີ່ລູກເຮັດໃຫ້ພໍ່ແມ່ ຮູ້ສຶກພູມໃຈເປັນພິເສດ ບໍ່ວ່າຈະເປັນການສະແດງຄວາມສຸ ພາບ, ມີນ້ຳໃຈ ຫລື ສະແດງຄວາມສາມາດພິເສດອື່ນໆ. ພໍ່ແມ່ຄວນຈະໃຊ້ເວລາດີໆ ບອກລູກວ່າ ຮູ້ສຶກພູມໃຈໃນຕົວລູກຫລາຍມັນ ອາດປ່ຽນເປັນພະລັງ ແລະ ກຳລັງໃຈໃຫ້ລູກກ້າວຕໍ່ໄປໃນວັນຕໍ່ຫນ້າ.

3. ພໍ່ແມ່ສະຫນັບສະຫນູນລູກສະເຫມີ: ບໍ່ຄວນເອົາລູກໄປປຽບທຽບກັບຕົວທ່ານຕອນສະໄຫມຍັງເປັນເດັກນ້ອຍ ຍ້ອນມຸມມອງທີ່ແຕກ ຕ່າງກັນລະຫວ່າງພໍ່ແມ່ກັບລູກຈະເຮັດໃຫ້ເກີດບັນຫາຮຸນແຮງໄດ້ຖ້າໄປບັງຄັບລູກຫລາຍລູກຈະຮູ້ສຶກບໍ່ມີຄວາມເປັນສ່ວນຕົວ ແລະ ອິດ ສະຫລະຈົນກາຍເປັນຄົນບໍ່ຫມັ້ນໃຈໃນຕົວເອງ.

4. ພໍ່ແມ່ເຊື່ອຫມັ້ນໃນຕົວລູກສະເຫມີ: ໄລຍະເວລາຫນຶ່ງໂດຍສະເພາະເມື່ອລູກກ້າວເຂົ້າສູ່ໄວຫນຸ່ມຄວາມປ່ຽນ ແປງຫລາຍໆຢ່າງ ເຂົ້າ ມາຈົນພໍ່ແມ່ຮັບບໍ່ໄດ້ລູກອາດສູນເສຍຄວາມຫມັ້ນໃຈໃນການຕັດສິນໃຈ ຫລື ລົງມືເຮັດສິ່ງໃດສິ່ງຫນຶ່ງ ທ່ານລອງຖາມຕົວເອງເບິ່ງວ່າ ເຄີຍສະຫລະເວລາບອກລູກຫລືບໍ່ວ່າ ພໍ່ກັບແມ່ເຊື່ອຫມັ້ນໃນຕົວລູກຫລາຍຊ່ຳໃດບໍ່ວ່າຈະເກີດຫຍັງຂຶ້ນພໍ່ແມ່ກໍ່ຈະຢູ່ຂ້າງລູກສະເຫມີ.

5. ພໍ່ແມ່ຂໍໂທດ: ບາງຄັ້ງການຂໍໂທດມັນເປັນສິ່ງທີ່ຍາກທີ່ສຸດທີ່ຈະເວົ້າຄໍາວ່າຂໍໂທດຈາກພໍ່ແມ່ນັ້ນລູກເອງກໍ່ຄວນມີເຫດຜົນ ແລະ ຮູ້ ຈັກບາບບຸນຄຸນໂທດນຳເພາະລູກບໍ່ມີສິດທີ່ຈະຖຽງຄວາມພໍ່ແມ່, ການທີ່ພໍ່ແມ່ກ່າວຄຳຂໍໂທດລູກເມື່ອເຮັດຜິດນັ້ນ ບໍ່ໄດ້ຫມາຍຄວາມວ່າ ລູກດູຖູກຄວາມ ເປັນພໍ່ແມ່ໃນທາງກັບກັນການທີ່ພໍ່ແມ່ຍອມຮັບ ແລະ ກ້າເວົ້າຂໍໂທດນັ້ນ ມັນຍິ່ງເຮັດໃຫ້ທຸກຄົນຮຽນຮູ້ທີ່ຈະເຄົາລົບຕົວ ເອງ ແລະ ຍອມຮັບໃນສິ່ງທີ່ຕົນເຮັດລົງໄປ.

ທີ່ມາ: http://ecom.org.la/news.php?col=12&id=4825

ຜົວມີໜ້າທີ່ຕໍ່ເມຍແນວໃດ? ຈະເຮັດໃຫ້ຄອບຄົວມີຄວາມສຸກ

20 Jul

ຄຳວ່າ ຄອບຄົວ ແມ່ນພື້ນຖານຂອງສັງຄົມໜຶ່ງ ຢູ່ໃນຄອບຄົວໜຶ່ງ ປະກອບມີ ພໍ່-ແມ່ ແລະ ລູກ ທຸກໆຄົນໃນຄອບຄົວ ກໍຈະມີຄວາມເປັນເອກະພາບ ເທົ່າທຽມກັນ ແລະ ມີໜ້າທີ່ປະຕິບັດຕໍ່ກັນ ລະຫວ່າງ ພໍ່-ແມ່ ກໍຄື ຜົວ-ເມຍ ເພື່ອຄວາມຢູ່ດີກິນດີຂອງຄອບຄົວ ແລະ ເພື່ອຢູ່ຮ່ວມກັນ ຢ່າງມີຄວາມສຸກ ກໍຕໍ່ເມື່ອທຸກຄົນໃຫ້ກຽດເຊິ່ງກັນ ແລະ ກັນ ໂດຍສະເພາະແມ່ນ ຜູ້ເປັນຜົວ ຕ້ອງໃຫ້ກຽດເມຍເປັນພິເສດ ເພາະເມຍຄືຫົວໃຈຫຼັກຂອງຜົວ ແລະ ເປັນຄົນພິເສດທີ່ສຸດຂອງຜົວ.

ກ່ອນຈະມາເປັນຄູ່ຜົວເມຍກັນໄດ້ ຍິງ-ຊາຍ ແມ່ນຢູ່ຄົນລະທິດທາງກັນ ບໍ່ແມ່ນສາຍຍາດພີ່ນ້ອງກັນ ບໍ່ເຄີຍເຫັນໜ້າກັນມາກ່ອນ ແຕ່ເມື່ອໄດ້ມາພົບກັນ ກໍຕ້ອງຜ່ານຊີວິດຂອງຄວາມຮັກ ຄວາມຜູກພັນ ຄວາມເຫັນອົກເຫັນໃຈ ແລະ ຄວາມເຂົ້າໃຈ ຮັກໄຄ່ເຊິ່ງກັນ ແລະ ກັນ ຈຶ່ງມີການໂອ້ລົມກັນ ຈົນເປັນຄູ່ຜົວ-ເມຍກັນ ແຕ່ຄວາມຮັກນັ້ນ ຕ້ອງຊາບຊຶມເຂົ້າເຖິງຫົວໃຈ ບໍ່ແມ່ນຄວາມຮັກແບບສັນພີ່ນ້ອງ ຫຼື ພໍ່ແມ່ ເຊິ່ງເປັນຄວາມຮັກທີ່ຢູ່ຮ່ວມກັນ ແລະ ໃຫ້ຄວາມສຸກແກ່ກັນໄດ້ ເມື່ອຢູ່ຮ່ວມກັນເປັນຄູ່ຜົວ-ເມຍ ເປັນຄອບຄົວກັນແລ້ວ ກໍຕ້ອງມີການຊ່ວຍກັນ ສ້າງສາພັດທະນາ ເພື່ອເຮັດໃຫ້ຄອບຄົວ ມີຄວາມສຸກ ຈະເຮັດຫຍັງ ຈະໄປໃສ ກໍຕ້ອງມີການປຶກສາຫາລື ບອກແຈ້ງໃຫ້ກັນ ອ້າຍຮູ້ສອງ ນ້ອງຮູ້ໜຶ່ງ ເພື່ອຄວາມໂປ່ງໃສ ໄວ້ເນື້ອເຊື່ອໃຈເຊິ່ງກັນ ແລະ ກັນ ບໍ່ໃຫ້ຄິດ ບໍ່ໃຫ້ເວົ້າ ບໍ່ໃຫ້ກະທຳ ໃນສິ່ງທີ່ມາກະທົບຈິດໃຈກັນ ໂດຍສະເພາະແມ່ນ ຜູ້ເປັນຜົວ ຕ້ອງປະຕິບັດ 3 ດີ 2 ໜ້າທີ່ຄື: ດີອັນທີ 1 ໝາຍເຖິງເປັນຜົວທີ່ດີຂອງເມຍ ດີອັນທີ 2 ເປັນພໍ່ທີ່ດີຂອງລູກ ດີອັນທີ 3 ເປັນຫົວໜ້າທີ່ດີຂອງຄອບຄົວ ແລະ 2 ໜ້າທີ່ຄື: ໜ້າທີ 1 ຮັບຜິດຊອບຄວາມເປັນພໍ່ ໜ້​າທີ 2 ຮັບຜິດຊອບຄວາມເປັນຫົວໜ້າຄອບຄົວຄື ຕ້ອງເອົາໃຈໃສ່ ສ້າງສາພັດທະນາຄອບຄົວ ໃຫ້ມີຄວາມຢູ່ດີກິນດີ ບໍ່ຄິດນອກໃຈລູກໃຈເມຍ ການສ້າງຄອບຄົວນັ້ນ ແມ່ນເປັນສິ່ງທີ່ຍາກທີ່ສຸດ ບູຮານຈຶ່ງເວົ້າວ່າ ການສ້າງເປັນພໍ່ນັ້ນງ່າຍ ແຕ່ກໍ່ໃຫ້ເປັນເຮືອນນັ້ນຍາກ ເພາະວ່າການເອົາລູກເອົາເມຍນັ້ນງ່າຍ ຈະເອົາມື້ໃດກໍໄດ້ ແຕ່ຖ້າເອົາມາແລ້ວ ຈະເປັນຜູ້ມາລ້ຽງດູເຂົາ ຈະເປັນຜູ້ຮັບຜິດຊອບຫົວໜ້າຄອບຄົວນັ້ນ ແມ່ນຍາກຫຼາຍ ຕ້ອງຮັບພາລະໜ້າທີ່ທຸກຢ່າງ.

ໃນທາງພຸດທະສາດສະໜາ ກໍໄດ້ສອນໄວ້ວ່າ ຜູ້ເປັນຜົວ ຄວນປະຕິບັດຕໍ່ເມຍ 5 ຢ່າງຄື:

1. ເວລາເວົ້າລົມກັບເມຍ ໃຫ້ສຸພາບອ່ອນຫວານ ບໍ່ເວົ້າຮ້າຍ ຫຼື ດ່າເມຍ ໃຫ້ຍົກຍ້ອງເມຍຂອງຕົນເອງ ແລະ ຮັບຮອງເອົາວ່າ ເປັນເມຍຂອງຕົນ ຕາມໂອກາດທີ່ສົມຄວນ ຄືໃນຂໍ້ນີ້ ທີ່ເຮົາເຫັນຜູ້ຊາຍບາງຄົນ ເມື່ອໄປພົບໝູ່ເພື່ອນ ຫຼື ເພດກົງກັນຂ້າມ ກໍມັກເວົ້າວ່າ ນັ້ນຄືໝູ່ ຫຼື ນ້ອງສາວຂອງເຮົາ ເປັນຕົ້ນ.

2. ບໍ່ດູໝິ່ນດູຖູກເມຍ ວ່າເປັນຄົນຮັບໃຊ້ ແລະ ບໍ່ສະແດງກິລິຍາແນວໃດແນວໜຶ່ງຕໍ່ເມຍ ເຊິ່ງເປັນການໝິ່ນປະມາດ ເຊັ່ນ: ເວົ້າວ່າເມຍເຮັດຫຍັງບໍ່ເປັນ ເປັນຄົນໂງ່ຈ້າຫຼ້າຫຼັງ ບໍ່ສະຫຼາດ ແລະ ຮ້າຍດ່າເມຍແນວນັ້ນ ແນວນີ້ ເປັນຕົ້ນ.

3. ບໍ່ປະພຶດນອກໃຈເມຍຂອງຕົນ ບໍ່ໃຫ້ລັກຫຼິ້ນຊູ້ກັບຜູ້ຍິງຄົນອື່ນ ເຊັ່ນ: ຜູ້ຊາຍຫຼາຍຄົນ ເມື່ອຢູ່ຫ່າງໄກເມຍ ຫຼື ເວລາໄປທ່ຽວຫຼິ້ນກັບໝູ່ເພື່ອນ ເມື່ອໄດ້ພົບເຫັນຍິງສາວງາມ ກໍມັກຈະຄິດນອກໃຈລູກໃຈເມຍ ນີ້ເປັນສິ່ງທີ່ບໍ່ດີ ເຮັດໃຫ້ຄອບຄົວແຕກແຍກກັນໄດ້.

4. ຍົກຍ້ອງເມຍ ໃຫ້ເປັນຄົນສຳຄັນໃນເຮືອນ ມອບສິດທຸກຢ່າງໃນເຮືອນ ໃຫ້ເມຍເປັນເຈົ້າຂອງ ເຊັ່ນ: ເງິນ-ຄຳທີ່ຫາມາໄດ້ ຕ້ອງມອບໃຫ້ເມຍ ເປັນຜູ້ເກັບຮັກສາ ເປັນຕົ້ນ.

5. ຊອກຫາສິ່ງຂອງມີຄ່າມາໃຫ້ເມຍ ເຊັ່ນ: ເຄື່ອງຕົກແຕ່ງປະດັບປະດາ ສຳລັບຜູ້ຍິງ ເວລາມາຈາກທີ່ອື່ນທາງໄກ ຕ້ອງມີສິ່ງຂອງມາຝາກ ເພື່ອໃຫ້ກຳລັງໃຈແກ່ເມຍ ແລະ ເປັນການສະແດງຄວາມສັດຊື່ຕໍ່ເມຍ.

ໜ້າທີ່ຂອງຜົວທີ່ມີຕໍ່ເມຍ ຜົວຕ້ອງເປັນຄົນໃຈເຢັນ ເວລາຜິດໃຈກັນ ຜົວຕ້ອງໃຫ້ອະໄພ ເມຍເປັນໄຟ ຜົວຕ້ອງເປັນນ້ຳ ບໍ່ແມ່ນເມຍເປັນໄຟ ຜົວເປັນນ້ຳມັນ ກໍຈະເຮັດໃຫ້ຄອບຄົວແຕກຫັກກັນໄດ້ ສະນັ້ນ ຖ້າຄອບຄົວໃດ ຫາກມີບັນຫາຢູ່ ລອງອ່ານ ແລະ ພິຈາລະນາ ນຳໄປໃຊ້ຈະເກີດປະໂຫຍດ ແກ່ຄອບຄົວໄດ້ ເພາະວ່າຄອບຄົວນັ້ນ ເປັນຈຸດສຳຄັນຂອງການດຳລົງຊີວິດ ຖ້າຄອບຄົວມີຄວາມສະຫງົບ ຊີວິດກໍມີຄວາມສຸກ ແລະ ເຮັດໃຫ້ລູກເຕົ້າ ມີອະນາຄົດອັນສົດໃສ.

ທີ່ມາ: www.vientianemai.net

"ແມ່ເຮືອນ"… ເໝືອນດັ່ງເສົາຫຼັກ

25 Jun

ຄຳວ່າ “ແມ່ເຮືອນ” ຟັງແລ້ວມັນຮູ້ສຶກອົບອຸ່ນ ຜູກພັນ ເຊື່ອໝັ້ນ ແລະ ມ່ວນຫູດີ ຄອບຄົວໃດກໍຕາມ ທີ່ມີແມ່ເຮືອນເປັນ ເສົາຫຼັກ ສະມາຊິກທຸກຄົນກໍຮູ້ສຶກສະບາຍໃຈ ແຕ່ປັດຈຸບັນ ມີບາງຄົນກໍສະຫຼອກກອກ ຢາກປ່ຽນຊື່ມາເປັນ “ແມ່ບ້ານ” ຍ້ອນລຶ້ງໄປຕະຫຼາດຢູ່ປະເທດໃກ້ຄຽງ ຟັງແລ້ວຍິ່ງຮູ້ສຶກອີ່ດູຕົນຜູ້ຍິງພວກເຮົາຫຼາຍຂຶ້ນ.

ເພາະພຽງແຕ່ດູແລເຮືອນແຕ່ລະມື້ ມັນກໍຫຍຸ້ງຍາກລຳບາກພໍແຮງແລ້ວ ຈະໃຫ້ດູແລບ້ານທີ່ມີເຮືອນເປັນ 400-500 ຫຼັງຄາ ຢ້ານແມ່ຍິງຍິ່ງຈະສັບສົນ ຈົນບໍ່ມີເວລາໄດ້ດູແລຕົນເອງ ສະນັ້ນ ໜ້າທີ່ດູແລເບິ່ງແຍງບ້ານ ຄວນຈະປ່ວຍໃຫ້ເປັນຄວາມຮັບ ຜິດຊອບຂອງນາຍບ້ານເພິ່ນສາ ເພາະມັນມີກົດໝາຍການປົກຄອງທ້ອງຖິ່ນຮັບຮອງແລ້ວ.

ເດືອນກ່ອນໄດ້ໄປຮ່ວມເຝິກອົບຮົມເລື່ອງບົດບາດ ຍິ່ງ-ຊາຍ ເພິ່ນແຮ່ງບິນໄປໄກອີກ ບອກວ່າ: ອາຊີບແມ່ເຮືອນຄວນຈະ ປ່ຽນມາເປັນ “ຜູ້ອອກແຮງງານໃນຄົວເຮືອນ” ວ່າຊັ້ນ ໂດຍໃຫ້ເຫດຜົນງ່າຍໆວ່າ: ສູ່ມື້ນີ້ວຽກເຮືອນ (ແມ່ເຮືອນ) ຜູ້ຊາຍກໍ ໄດ້ຊ່ວຍ ຂ້າພະເຈົ້າບໍ່ຖຽງດອກ ແຕ່ທີ່ຮູ້ສຶກແປກ ແລະ ບໍ່ເຂົ້າໃຈກໍແມ່ນ ບາດທະຫານຫັ້ນເດ ເຫັນມີແຕ່ຜູ້ຊາຍຕວາ ທີ່ເປັນ ແມ່ທັບ ຄືບໍ່ເຫັນເພິ່ນຄິດຢາກປ່ຽນຊື່ມາເປັນ “ພໍ່ທັບ” ແດ່… ເປັນຕາຊັງເນາະ! ໃນວັດຈະນານຸກົມຂອງ ດຣ. ທອງຄຳ ອ່ອນມະນີສອນ ຂຽນວ່າ: ແມ່ເຮືອນ ແມ່ນຜູ້ເຮັດວຽກໃນເຮືອນ ເປັນຄົນດູແລສະມາຊິກ ເບິ່ງແຍງບ່ອນຢູ່ ບ່ອນນອນ ບ່ອນກິນ ຫຼື ແມ່ນຜູ້ເປັນໃຫຍ່ຢູ່ໃນເຮືອນ ພຸ້ນເຫັນບໍ່? ກຽດຕິຍົດ ຊື່ສຽງຂອງແມ່ເຮືອນ ບໍ່ຕ້ອງນ້ອຍໃຈດອກ! ເວົ້າເລື່ອງ ຄວາມຢູ່ດີມີສຸກຂອງຄອບຄົວ ນັບແຕ່ຍາມເຈັບຍາມໄຂ້ (ນັບທັງໄຂ້ກາຍ ແລະ ໄຂ້ໃຈ) ຜູ້ທີ່ຫ່ວງໄຍ ແລະ ເປັນທຸກທີ່ສຸດ ກໍແມ່ນ “ແມ່” ເພາະແມ່ນັ້ນ ເພິ່ນອູ້ມທ້ອງເຮົາມາຕັ້ງເກົ້າເດືອນ ສະນັ້ນ ຄວາມຮູ້ສຶກຜູກພັນເຂົ້າໃຈຈຶ່ງມີຫຼາຍກວ່າ ເພິ່ນຮູ້ຈັກ ສະພາບຮ່າງກາຍ ແລະ ສະພາບຈິດໃຈຂອງລູກແຕ່ລະຄົນ ທັງຮູ້ອີກວ່າຈະຮັບມືແຕ່ລະອາການນັ້ນແນວໃດ? ປິ່ນປົວດ້ວຍ ຢາຫຍັງ ? ຍັງມີແມ່ຫຼາຍຄົນ ສາມາດກາຍເປັນທ່ານໝໍຜູ້ຊ່ຽວຊານປະຈຳຄອບຄົວ (ຂໍໂທດເດີ !) ຍົກເວັ້ນແຕ່ແມ່ຜູ້ທີ່ລ້ຽງລູກ ຕາມມີຕາມເກີດ ຫຼື ລ້ຽງຊື່ໆ ລ້ຽງບໍ່ຮັບຜິດຊອບ ແມ່ປະເພດນີ້ຈະບໍ່ຮູ້ຫຍັງເລີຍ ! ລູກໄປໃສກໍບໍ່ຮູ້ ? ຮຽງໄດ້ທີເທົ່າໃດກໍບໍ່ ສົນ (ອະນາຄົດຂອງມຶງ) ລູກຈ່ອຍແຫ້ງຍ້ອນຫຍັງກໍບໍ່ກ່ຽວ ? ກິນເກມຫັ້ນ “ມັກນະ ? (ເພິ່ນໂຍນຄວາມຜິດ) ເຖິງວ່າ ບົດບາດຍິງ-ຊາຍກຳລັງມາແຮງ ແຕ່ແນວໃດກໍຕາມບົດບາດຂອງຄຳວ່າ ແມ່ ກໍຍັງຕ້ອງສົ່ງເສີມ …

ຂ້າພະເຈົ້າຍັງຈື່ໄດ້ດີ ຕອນລັດຖະມົນຕີຊ່ວຍເພດຍິງຂອງລາວເຮົາ ທ່ານໜື່ງຂຶນປາຖະກະຖາຢູ່ຕໍ່ໜ້າ ບັນດາທ່ານສາດ ສະດາຈານ ດຣ. ແລະ ວິຊາການຊັ້ນຫົວກະທິຂອງໂຮງຮຽນຊື່ດັງແຫ່ງໜື່ງ ຈົນໄດ້ຮັບສຽງຕົບມືສະໜັ່ນຫວັ່ນໄຫວ ຍ້ອນເພິ່ນ ກ່າວປະໂຫຍກໜື່ງວ່າ: “ເຖິງເປັນລັດຖະມົນຕີ ມີຄວາມຮັບຜິດຊອບຕໍ່ໜ້າທີ່ ວຽກງານທີ່ຕ້ອງແບກຫາບ ແຕ່ເວລາກັບເຮືອນ ຂ້າພະເຈົ້າກໍຍັງເປັນ ແມ່ຄົນໜື່ງ ທີ່ຕ້ອງໄດ້ສະແດງຄວາມຮັກ ຄວາມຫວ່ງໄຍຕໍ່ລູກຕໍ່ຜົວ ຂ້າພະເຈົ້າກໍຍັງແມ່ນແມ່ຍິງ ທຳມະດາຄົນໜື່ງ ນັ້ນກໍຄື ແມ່ເຮືອນ” ຄວາມຈິງແລ້ວ ການເກີດມາເປັນລູກຜູ້ຍິງ ມັນແມ່ນການຫອບອູ້ມເອົາຄວາມຄາດ ຫວັງຂອງຄົນຫຼາຍສິບຫຼາຍ ລ້ານ… ຄົນ ທີ່ທຸກກ່ອນໝູ່ ກໍແມ່ນແມ່ຍິງທຸກ ຢ້ານຜົວບໍ່ໄດ້ຢູ່ໄດ້ກິນ ຢ້ານຄົນນິນທາບໍ່ມີໜ້າມີຕາ ໂດຍສະເພາະ ໃນເວລາ ທີ່ມີການເສຍສະຫຼະ (ອອກການ) ກໍຕ້ອງແມ່ນເມຍອອກ ເພື່ອເປີດທາງໃຫ້ຜົວກ້າວໜ້າ ສ່ວນເມຍ ກໍມາເປັນແມ່ເຮືອນ ປານນັ້ນ ຍັງມີຜົວບາງຄົນບອກວ່າ: ເມຍຢູ່ເຮືອນຊື່ໆ ບໍ່ໄດ້ເຮັດຫຍັງ ? ຜົວແບບຊີ້ … ເປັນຕາເອົາ ສາກກະເບືອ ໃຫ້ຖືຍ່າງເລາະບ້ານ ທຸກອີກອັນໜື່ງຂອງແມ່ເຮືອນ ແມ່ທຸກຢ້ານລູກເຕົ້າບໍ່ໄດ້ຮ່ຳບໍ່ໄດ້ຮຽນ ຍິ່ງເປັນແມ່ເຮືອນ ປະເພດມີຜົວເມົາມາເຮືອນແລ້ວ ຊອກຫາເລື່ອງຜິດເມຍຕະຫຼອດ ແມ່ຍິງຍິ່ງທຸກທໍລະມານເຈັບປວດ ຫົວໃຈ ຄຳວ່າແມ່ ກໍຄືຜູ້ “ໃຫ້” ຄືໃຫ້ໄດ້ມີຊີວິດເກີດມາ ໃຫ້ຄວາມຮັກຄວາມອົບອຸ່ນ ໃຫ້ຄວາມເອົາໃຈໃສ່ໃກ້ຊິດສະໜິດສະໜົມ ໃຫ້ຄວາມດູແລເບິ່ງ ແຍງ ສະນັ້ນ ແມ່ຍັງຕ້ອງເປັນເພື່ອນທີ່ໄວວາງໃຈຂອງລູກໆສະເໝີ ເມື່ອລູກມີບັນຫາກໍສາມາດປຶກສານຳໄດ້ທຸກໆເລື່ອງ ໂດຍບໍ່ຢ້ານ ຫຼື ອາຍແມ່ ແຕ່ແນວໃດກໍຕາມ ພໍ່ກໍບໍ່ຄວນຈະເມີນເສີຍ ຫຼື ປ່ອຍປະໃຫ້ແມ່ເຮັດໜ້າທີ່ນີ້ໂດຍລຳພັງ… ພໍ່ກໍຍັງ ເປັນໄດ້ທັງຂາໜ້າ ຂາຫຼັງ ຂາຊ້າຍ ແລະ ຂາຂວາຮ່ວມກັບແມ່ ຈະຂາດຂາໃດຂາໜຶ່ງກໍບໍ່ໄດ້ ເຫັນວ່າຂອນໄຫຼນ້ຳຢ່າຈົ່ມຫຼາຍ ວ່າຂອນໂດກ… ບາງເທື່ອລົງແຊ່ນ້ຳ… ຫຼາຍມື້ຊິບົ່ງໃບ.

ສິ່ງທີ່ຜູ້ຍິງຕ້ອງການຫລັງຈາກແຕ່ງງານກັນແລ້ວ

7 May

ຄວາມຄາດຫວັງເປັນສິ່ງມະຫັດສະຈັນແບບຫນື່ງຂອງມະນຸດ ທີ່ຊ່ວຍຍູ້ໃຫ້ເກິດສິ່ງດີໆ ງາມໆ ຕາມມາບໍ່ຫນ້ອຍ ມະນຸດລໍຄອຍສິ່ງໃດຫນື່ງໄດ້ດົນໆ ເພາະຍັງມີຄວາມຄາດຫວັງຝັງໃຈຢູ່ ແຕ່ຖ້າຢູ່ໆ ຄວາມຄາດຫວັງຫມົດໄປ ຄົງບໍ່ມີກຳລັງໃຈລໍຖ້າໄດ້ດົນອີກຕໍ່ໄປ ຄວາມຄາດຫວັງຈຶ່ງເຫມືອນຢາຊູກຳລັງຊະນິດຫນື່ງຊຶ່ງມະນຸດຮຽກຫາ ນຳມາເປັນອາພອນປະດັບຄວາມຄິດຈິດໃຈ, ແນ່ນອນທີ່ສຸດເມື່ອມີຄວາມຄາດຫວັງ ກໍ່ຍ່ອມຕ້ອງມີຄວາມສົມຫວັງ ຫລື ຜິດຫວັງຕາມມາ ບາງຄົນສົມຫວັງເຕັມໆ ບາງຄົນຜິດຫວັງເຕັມໆ ຫລື ອາດຈະມີບາງຄົນທີ່ມີທັງສົມຫວັງ ແລະ ຜິດຫວັງປະປົນກັນໄປ ຊຶ່ງບໍ່ແມ່ນເລື່ອງແປກອັນໃດໃນຊີວິດຂອງຄົນເຮົາ ເຊັ່ນດຽວກັບຊີວິດຄູ່ທີ່ຄົນສອງຄົນມາຢູ່ນຳກັນ ຕ່າງມີຄວາມຝັນ ແລະ ຄວາມຄາດຫວັງຝັງແຫນັ້ນ ຢູ່ໃນຄວາມຮູ້ສຶກນຶກຄິດກັນເກືອບທຸກຄົນ, ສຸດຍອດຂອງຄວາມຝັນໃນຊີວິດຄູ່ ຄື: ຢູ່ກັນຢ່າງມີຄວາມສຸກ ອາດຈະຟັງໄປເປັນທຳມະແນ່ ແຕ່ກໍ່ຕ້ອງຍອມຮັບວ່າເປັນຄວາມຈິງ ໃນຂະນະທີ່ຄວາມຄາດຫວັງຫລັງການແຕ່ງງານ ຂອງຜູ້ຊາຍຜູ້ຍິງສອງຄົນທີ່ໃຊ້ຊີວິດຄູ່ຢູ່ນຳກັນ ອາດຈະມີສາລະພັດເລື້ອງແຕກຕ່າງກັນອອກໄປ ຜູ້ຊາຍກໍ່ອາດຈະຄາດຫວັງຈາກຜູ້ຍິງທີ່ເປັນເມຍແບບຫນື່ງ, ຂະນະທີ່ຜູ້ຍິງກໍ່ຄາດຫວັງຈາກຜູ້ຊາຍ ທີ່ເປັນຜົວອີກແບບຫນື່ງ ບໍ່ຮູ້ວ່າມີການສຳຫລວດກວດສອບກັນໄວ້ບໍ່ວ່າ ຜົວ ຫລື ເມຍມີຄວາມຄາດຫວັງກັນຫນ້ອຍຫລາຍພຽງໃດ ແລະ ຄາດຫວັງອັນໃດກັນແນ່ຫລັງການແຕ່ງງານ. ຜູ້ຍິງຄວນຈະຄາດຫວັງອັນໃດຈາກຜູ້ຊາຍຫລັງແຕ່ງງານ ສິ່ງທີ່ຜູ້ຍິງຄາດຫວັງອາດຈະມີຢູ່ 3 ເລື່ອງຫລັກນຳກັນຄື:

1. ຄາດຫວັງທີ່ຈະໄດ້ຄວາມຮັກ ຄວາມອົບອຸ່ນ ເປັນທຳມະດາຂອງຜູ້ຍິງເກືອບທຸກຄົນທີ່ຈະມີຄວາມຮູ້ສຶກຄ້າຍໆກັນຄື: ຈະແຕ່ງງານກັບໃຜມັກຈະແຕ່ງທີ່ຂື້ນກັບພື້ນຖານຂອງຄວາມຮັກ ເມື່ອແຕ່ງງານທີ່ຢູ່ບົນພື້ນຖານຂອງຄວາມຮັກ ກໍ່ຫວັງທີ່ຈະໄດ້ຮັບຄວາມຮັກຕອບຢ່າງສຸດຫົວໃຈ ຄືກັບທີ່ເຈົ້າມອບຄວາມຮັກໃຫ້ສຸດຫົວໃຈເຊັ່ນກັນ ຄວາມຮັກຈຶ່ງເປັນສິ່ງທີ່ຜູ້ຍິງທຸກຄົນທີ່ເປັນເມຍຫວັງຈະໄດ້ຮັບຈາກຜູ້ຊາຍທີ່ເປັນຜົວຫລາຍທີ່ສຸດ, ນອກຈາກຄວາມຮັກແລ້ວ ຍັງຄາດຫວັງຈະໄດ້ ຄວາມອົບອຸ່ນ ຈາກຜູ້ຊາຍທີ່ເຈົ້າຮັກອີກນຳ ຄວາມອົບອຸ່ນທີ່ບໍ່ໄດ້ມີຄວາມຫມາຍພຽງການໂອບກອດເທົ່ານັ້ນ ແຕ່ຄວາມຫມາຍຂອງມັນມີຫລາກຫລາຍ ພຽງແຕ່ສຽງໂທລະສັດທັກທາຍຖາມຂ່າວຄາວ ນອກຈາກຄຳວ່າ ສະບາຍດີບໍ່? ກໍ່ສາມາດສ້າງຄວາມອົບອຸ່ນໃຫ້ໄດ້ບໍ່ຫນ້ອຍ ຫລື ການຄອຍສັງເກດຖາມໄຖ່ເຖິງຄວາມປ່ຽນແປງທີ່ບໍ່ທຳທ່າເຮັດ ກໍ່ຍ່ອມສ້າງຄວາມອົບອຸ່ນໄດ້ອີກແບບ ການແອບທຳເຊີໄພຣ໌ໃຫ້ງວຍງົງໃນບາງເວລາກໍ່ຈະສ້າງຄວາມອົບອຸ່ນຄືກັນ ການໃຫ້ກຽດເມຍທັງຕໍ່ຫນ້າ ແລະ ລັບຫລັງກໍ່ສ້າງພະລັງແຫ່ງຄວາມອົບອຸ່ນ ທີ່ຫອມຫວນຊວນໃຫ້ໃຝ່ຫາຢູ່ຕະຫລອດເວລາ ຄວາມຮັກ ຄວາມອົບອຸ່ນຈຶ່ງເປັນຕົ້ນທຶນຂອງຊີວິດທີ່ເມຍມັກຈະຄາດຫວັງຈາກຜົວ ຄົນທີ່ລາວມອບຊີວິດຈິດໃຈໃຫ້ເຕັມຮ້ອຍ.

2. ຄາດຫວັງທີ່ຈະໄດ້ຮັບການເບິ່ງແຍງຕາມອັດຕະພາບ ເຖິງວ່າໂລກຍຸກໃຫມ່ຈະເປັນໂລກຂອງຄວາມສະເຫມີພາບລະຫວ່າງຍິງຊາຍ ແຕ່ສຳຫລັບຄວາມເປັນຊີວິດຄູ່ທີ່ຢູ່ກັນແບບລາວໆ ກໍ່ຕ້ອງຍອມຮັບວ່າ ຜົວຍັງຕ້ອງຖືເປັນພາລະຫນ້າທີ່ທີ່ຕ້ອງເບິ່ງແຍງເມຍຕາມສົມຄວນ ໃນສັງຄົມລາວກໍ່ມັກຈະຖືວ່າຜົວມີຫນ້າທີ່ຫາລາຍໄດ້ມາຄ້ຳຊູຄອບຄົວ ເຖິງວ່າສັງຄົມສະໄຫມໃຫມ່ທັງຜົວເມຍຈະຊ່ວຍກັນ ທຳມາຫາກິນກໍ່ຕາມ ແຕ່ຄວາມເປັນຈິງລຶກໆ ຂອງສັງຄົມລາວຍັງຄາດຫວັງໃຫ້ຜົວມີພາລະຫນ້າທີ່ຮັບຜິດຊອບ ເລື່ອງການເບິ່ງແຍງຄອບຄົວ ຊຶ່ງລວມເຖິງເມຍນຳເປັນຫລັກ ແລະ ຄົງບໍ່ແມ່ນເລື່ອງຫນັກຂອງຜູ້ເປັນຜົວຈົນເກິນໄປ ເພາະເມຍກໍ່ຄົງຫວັງໃຫ້ເບິ່ງແຍງກັນຕາມອັດຕະພາບຫລາຍກວ່າ.

3. ຄວາມຄາດຫວັງທີ່ຈະໄດ້ພໍ່ທີ່ດີຂອງລູກ ຊີວິດຄູ່ເມື່ອຢູ່ນຳກັນກໍ່ຕ້ອງມີລູກເປັນທຳມະດາ ແຕ່ຈະບໍ່ທຳມະດາທັນທີເມື່ອຜົວທີ່ມີຖານະເປັນພໍ່ຂອງລູກນຳ ເປັນພໍ່ທີ່ບໍ່ດີ ບໍ່ວ່າຈະບໍ່ດີໃນທາງທີ່ເປັນແບບຢ່າງທີ່ບໍ່ດີຂອງລູກ ຫລື ອົບຮົມສັ່ງສອນໄປໃນທາງທີ່ບໍ່ເຫມາະສົມ ເຊັ່ນ: ອົບຮົມສັ່ງສອນລູກໃຫ້ເປັນຄົນເຫັນແກ່ໂຕເກິນໄປ ອັນທີ່ເປັນຄວາມບໍ່ດີທັງຫລາຍຜູ້ເປັນແມ່ຍ່ອມບໍ່ຢາກໃຫ້ຜູ້ເປັນພໍ່ສ້າງແນວບໍ່ໄປຕິດຝັງໃຈເຖິງລູກ ບໍ່ແມ່ນເລື່ອງແປກທີ່ຜູ້ຍິງຄົນຫນື່ງທີ່ມີລູກຈຶ່ງຄາດຫວັງທີ່ຈະໄດ້ພໍ່ທີ່ດີຂອງລູກ ຄວາມຄາດຫວັງຂອງຜູ້ຍິງຫລັງການແຕ່ງງານກັບໃຜຄົນຫນື່ງແລ້ວ ຄົງບໍ່ເປັນສິ່ງທີ່ຍາກປານໃດທີ່ຜູ້ຊາຍດີໆ ທີ່ຕັດສິນໃຈມີຄອບຄົວຈະໃຫ້ໄດ້ ໃຜທີ່ຮູ້ໂຕວ່າເປັນຜົວຢ່າລືມທຳຕົວໃຫ້ເປັນແບບຢ່າງທີ່ດີໆ ໃຫ້ຜູ້ຍິງທີ່ເຈົ້າຮັກສົມຫວັງໃນສິ່ງທີ່ລາວຄາດຫວັງນຳ.!

ແຫຼ່ງຂໍ້ມູນ : www.mahasan.com

ການຢ່າຮ້າງ …

4 May

ມື້ກ່ອນມີໂອກາດ ນັ່ງສົນທະນາກັບໝູ່ຄູ່ພັກພວກ ທີ່ບໍ່ພົບໜ້າພໍ້ຕາກັນດົນ ຊຶ່ງໄດ້ຍົບນຫາຄອບຄົວ ຂຶ້ນມາໂສເລ້ກັນ !..
ໜຶ່ງໃນບັນຫາທີ່ຕັ້ງຂຶ້ນ ແມ່ນກໍລະນີການຢ່າຮ້າງ ເຫັນວ່າສັງຄົມດຽວນີ້ ມີທ່າອ່ຽງສູງຫຼາຍ ເຊິ່ງແນ່ນອນ ມັນກໍອາດມາຈາກຫຼາຍສາເຫດນໍ ? ແຕ່ໃນນັ້ນ ບັນຫາປະເພນີຮີດຄອງ ບໍ່ຄ່ອຍມີຜູ້ເຄົາລົບນັບຖື ເຄັ່ງຄັດພໍປານໃດ ? ເຊັ່ນວ່າ ເຖົ້າແກ່ບູຮານເຄີຍເວົ້າໄວ້ວ່າ: … “ຍິງສາມຜົວ ເຈົ້າຫົວສາມວັດ ບໍ່ດີແລ…”ດຽວນີ້ບໍ່ເປັນດັ່ງວ່າ ບາງຄົນຢ່າຮ້າງເຖິງ 5-6 ຄັ້ງ ກໍຍັງມີ ແລະ ກໍຖືເປັນເລື່ອງທຳມະດາໄປແລ້ວ ! …
ຈາກການຢ່າຮ້າງນີ້ ກໍເລີຍມີການຕັ້ງບັນຫາຂຶ້ນມາ ມາຈາກການແຂ່ງຂັນໃນສັງຄົມ ເກີນໄປບໍ ? ເປັນຕົ້ນແມ່ນ ສັງຄົມບໍລິໂພກນິຍົມ ເຮັດໃຫ້ຄົນເຮີ່ ແລະ ບໍ່ຮູ້ຄວາມພໍ ? ອັນນີ້ກໍໜ້​ າເຫັນໃຈ ?
ອາຍຸເຄິ່ງຄົນແລ້ວ (50 ກ່ວາປີ) ກິນຢູ່ຖາວອນ ກໍຍັງບໍ່ມີ … ພາຫະນະຂັບຂີ່ກໍລົດຈັກຮ້າງ … ເງິນຄຳໃຊ້ຈ່າຍ ກໍຈັບໜ້າຫວິດຫຼັງ … ຜູ້ເປັນເມຍ ກໍຕ້ອງຕັ້ງເປັນບັນຫາ ເພາະອາຍຸເຂົາຍັງຫຼາຍຢູ່ (30 ກ່ວາປີ) ກ່ວາຊິໝົດ … ສະນັ້ນ ຈຶ່ງປະຕິເສດບໍ່ໄດ້ ທີ່ເຂົາຈະຕ້ອງ ຊອກທາງອອກໃຫ້ຊີວິດ ທີ່ດີກ່ວາ … ອັນນີ້ ຢາກໃຫ້ຜູ້ຊາຍເຮົາ ຍອມຮັບຄວາມເປັນຈິງນໍ ? ຫຼືບາງເທື່ອ ຕົນຍ ຍັງໜຸ່ມແໜ້ນກ່ວາ ເຂົາກໍມີຄວາມຕ້ອງການຢ່າງອື່ນ ທີ່ຕົນບໍ່ສາມາດຕອບສະໜອງໄດ້ ກໍຕ້ອງຍອມຮັບເຊັ່ນກັນ ອເອງເຂົ້າບຳນານແລ້ວ ແຕ່ນາງເມັນນັ້ນ ແມ່ນເວົ້າເລື່ອງການຍອມຮັບ … ສ່ວນວ່າເຫດຜົນ ໃນການຢ່າຮ້າງນັ້ນ ກໍຢາກໃຫ້ທັງສອງຝ່າຍ ໄດ້ຄິດຮ່ວມກັນ ບໍ່ຄວນຄິດເຖິງແຕ່ ວັດຖຸນິຍົມຫຼາຍເກີນໄປ ພໍຢູ່ພໍກິນຊ່ວຍເຫຼືອເຊິ່ງກັນ ແລະ ກັນ ກໍມີຄວາມສຸກໄດ້ … ເພາະບໍ່ແນ່ວ່າ ໄປເອົາຜູ້ໃໝ່ ຈະດີກ່ວາຜູ້ເກົ່າສະເໝີໄປ.
ເວົ້າເລື່ອງການຢ່າຮ້າງນີ້ ຕາມຂໍ້ມູນທີ່ອ່ານເຫັນ ໃນໜັງສືພິມສະບັບໜຶ່ງ ເມື່ອວັນທີ 14/4/2010ຊຶ່ງໄດ້ຂໍ້ມູນຈາກ ກົມຄຸ້ມຄອງ ກວດກາ ແລະ ສະຖິຕິສານ ຂອງສານປະຊາຊົນສູງສຸດ ນັ້ນວ່າ: ໃນປີ 2009 ເພິ່ນສົມທຽບຄະດີທີ່ເກີດຂຶ້ນ ທົ່ວປະເທດ ອັນດັບໜຶ່ງແມ່ນ ຄະດີອາຍາ ມີ 2.158 ເລື່ອງ ອັນດັບສອງ ຄະດີແພ່ງ 1.506 ເລື່ອງ ແລະ ອັນດັບສາມແມ່ນ ຄະດີຄອບຄົວ 1.163 ເລື່ອງ ແລະ ເກີດຫຼາຍກ່ວາໝູ່ ແມ່ນຢູ່ນະຄອນຫຼວງວຽງຈັນ ມີ 488ເລື່ອງ ໃນນັ້ນ ການຂໍຢ່າຮ້າງຈາກ ສາຍພົວພັນຜົວເມຍ ມີ 345 ເລື່ອງ ກວມເອົາ 70,70% …
ເບິ່ງຕົວເລກແລ້ວ ຮູ້ສຶກຢ່າງໃດ ?.
ຂໍອວຍພອນໃຫ້ ຄອບຄົວທຸກຄອບຄົວ ຈົ່ງໝັ້ນຄົງຕະຫຼອດໄປ !.
-2010

Follow

Get every new post delivered to your Inbox.